Isofri diskriminazzjoni, bullying, theddid fuq ħajtu u hate speech minħabba l-ġeneru li għażel f’soċjetà li għad trid tibdel il-mentalità tagħha
Il-ftuħ tal-Klinika Dedikata lill-Gender Wellbeing, li toffri servizzi u terapiji bla ħlas għall-persuni transgender, poġġa lil pajjiżna fuq ta’ quddiem nett fejn jidħlu d-drittijiet u s-sostenn lill-persuni LGBTIQ+. F’intervista ma’ Matthew Chircop (Queer) nidħlu fid-dinja reali u kemmxejn iebsa tiegħu fejn minkejja li l-affarijiet illum il-ġurnata huma aħjar rigward id-drittijiet tal-persuni transgender, jirrakkonta kemm huwa bata u għadu jbati minn diskriminazzjoni u bullying b’mod speċjali fl-iskejjel. Matthew jistqarr li fost l-agħar insulti lejh kienu dawk fejn għalliema rrifjutaw jgħajtulu bl-isem il-ġdid tiegħu tant li bdew jgħajtulu bin-numru tal-Karta tal-Identità, tgħajjir bi kliem iebes bħal sissy kif ukoll sofra hate speech fuq l-internet akkumpanjat minn theddid għal ħajtu.